• Биологи, нийгэм, сэтгэлзүйн хэрэгцээ бүрэн хангагдаагүйтэй холбоотой бие болон сэтгэлзүйд үүсч байгаа тааламжгүй мэдрэмжийг стресс гэж ойлгож болно.
• Жирэмсэн үеийн сэтгэлзүйн өөрчлөлт нь хэнд ч тохиолдож болно. Жирэмсэн үед эм бэлгийн даавар хэт ихэссэнтэй холбоотой сэтгэлзүйд өөрчлөлт үүсдэг байна. Энэ нь даралт ихсэх, хавагнах зэрэг жирэмсэн үед биед илэрдэг өөрчлөлттэй л ижил юм.

• Өсвөр үеийн жирэмслэлт
• Туслалцаа дэмжлэг багатай жирэмсэн эхчүүд
• Гэр бүлийн болон харилцааны зөрчилтэй жирэмсэн эхчүүд
• Урьд нь амжилтгүй жирэмслэлт явагдаж байсан эмэгтэйчүүд
• Жирэмсэн болохоосоо өмнө сэтгэцийн тулгамдсан асуудлаар эмнэлэгт хандаж байсан эмэгтэйчүүд илүү өртдөг.

Жирэмсэн үеийн стресс аюултай юу? Жирэмсэн үед стресстэй байх нь хэвлий дэх хүүхдэд нөлөөлөх болов уу?

Стрессээс шалтгаалсан удаан хугацааны нойргүйдэл, толгой өвдөлт, хоолны дуршлын өөрчлөлт нь урагт нөлөөлдөг болохыг судлаачид тодорхойлсоор байна. Байнгын сэтгэлийн зовиур, шаналгаатай байх нь цусны даралт ихэсгэн, булчингийн байнгын чангаралтай байснаар зулбах, ургийн жин бага байх, цагаасаа өмнө төрөх зэргийг үүсгэж буйг эх барих эмэгтэйчүүдийн эмч нар олон жилийн хугацаанд ажиглагдаж байна гэжээ.

Сайн эцэг, эх болохын тулд

• Аль хэдийн эцэг, эх болсон гэр бүл, хамаатан садан, найз нөхдийнхөө туршлагаас хуваалцаарай.
• Ээжүүдийн, аавуудын, эсвэл ижил настай хүүхдүүдийн группт нэгдээрэй.
• Шинэ эцэг эхчүүдэд зориулсан ном унших, мөн төрөлтийн өмнө зохион байгуулагддаг сургалтанд заавал хамрагдаарай.
• Удахгүй эцэг, эх болох гэж буйгаа хүлээн зөвшөөрч, ухамсарлаж, сэтгэлзүйгээ бэлтгэх хэрэгтэй.
• Хэрэгтэй үед хэн танд туслах боломжтой вэ? гэдгийг бодолцоорой.

Жирэмсэн ээж та өөртөө анхаарал тавиарай.

• Хангалттай унтаж амарч, зөв зохистой шим тэжээллэг хоол хүнсийг эрхэмлээрэй. Жирэмсэн үедээ хэт их жин нэмэхээс аль болох сэргийлээрэй. Хэвийн жирэмслэлтийн үед 10-12 кг нэмэгддэг байна.
• Өөртөө хэт их ачаалал үүсгэхээс зайлсхийгээрэй. Хэрэв сэтгэл санаа тогтворгүй, уур уцаар хүрээд тайван бус байвал ном, сэтгүүл унших, найзуудтайгаа уулзах утсаар ярих, явган алхах зэрэг өөрийнхөө хүссэн зүйлд анхаарлаа хандуулаарай. Ухаан бодлоо хянаж 5 минутын хугацаанд тайван байхад зүрхний цохилт, артерийн даралт, амьсгалын тоо хэвийн байдалдаа ордог байна.
• Хэрэв боломжтой бол төрсний дараа хэсэг хугацаанд нөхрөө эсвэл дотны хүмүүсээ өөртөө туслуулахаар эртнээс тохироорой.
• Хэрвээ та давтан төрөгч бол төрсний дараа бусад хүүхдүүдийнхээ хэрэгцээтэй зүйлсийг бэлдээрэй.
• Өөрийнхөө итгэдэг дотны хүмүүстэйгээ жирэмслэлт, төрөлтийн талаар өөрт үүсч байгаа мэдрэмж, сэтгэгдлээ хуваалцаарай.
• Өөрийнхөө эргэн тойронд эерэг харилцааг эрхэмлэж, өөдрөг үзэл бодолтой найз нөхөдтэйгөө илүү ойр байгаарай.
• Жирэмсэн байх үед бараг хүн болгон таны гэдсэнд зөвшөөрөлгүй хүрч, таны гэдэсний хэмжээ болон биеийн жингийн тань талаар элдэв сөрөг сэтгэгдэл төрүүлэхээр зүйл ярихад та сэтгэлзүйн хувьд бэлэн байх хэрэгтэй. Чиний гэдэс яагаад жижигхэн байнаа, хүүхдийн чинь хөгжил зүгээр байгаа, эсвэл ямар том гэдэстэй байнаа, төрөх гэж зовно доо, чи ямар их жин нэмээ вэ гэдэг үгнүүдийг магадгүй та олонтоо сонсож болох юм. Сэтгэлзүйчид энэ байдалд сэтгэлзүйгээрээ бэлэн байж, тэдэнд таарсан ухаалаг хариултыг урьдаас төлөвлөсөн байвал өөрт төрөх сөрөг сэтгэгдлийг бууруулж чадна гэж зөвлөжээ.
• Хэрэв танд эрүүл мэндтэй холбоотой ямар нэгэн зовиур илрээгүй, хяналтын эмч тань дасгал хийж болно гэж зөвлөсөн бол жирэмсэн үеийн дасгал, явган алхалт, усан сэлэлт, жирэмсний үеийн иогиор /Та манай сайтын ЖИРЭМСНИЙ ҮЕИЙН ИОГ хэсэгт зочилон мэргэжлийн багшийн удирдлаган дор гэртээ иогоор хичээллэх боломжтой/ хичээллээрэй. Дасгал хөдөлгөөн таны цусан хангамжийг нэмэгдүүлээд зогсохгүй, стрессийн эсрэг даавар ялгаруулж таныг тайван байлгахад туслах болно.
• Нөхөртэйгээ хүүхэдтэй болсноор амьдралд гарах шинэ өөрчлөлтүүдийн тухай сайтар ярилцаж, санал бодлоо солилцоорой.
• Интернетээс хэрэгцээтэй үнэн зөв мэдээлэл авахыг эрмэлзээрэй. Гэвч таны сэтгэлийг зовоосон эргэлзээ, айдас төрүүлэх мэдээллийн эх сурвалж, үнэн бодитой байдалд анхааралтай хандаарай.
• Хэрэв танд асуулт байвал эмчээс асуухаас айх, санаа зовох хэрэггүй.
• Эцэст нь гүнзгий амьсгал аваарай. Сэтгэл тавгүй уурлаж, бухимдсан үед зүрхний цохилт нэмэгдэж, ходоод орчим эвгүй оргиж, булчингууд чангарч олон удаа өнгөц амьсгалдаг. Энэ үед та тайвшруулах амьсгалын дасгалыг хийгээрэй.

Тайвшруулах амьсгалын дасгал – Амьсгалыг хамраараа авч хэвлий дүүргэн, гаргахдаа амаараа удаан хэвлийгээ хонхойтол гаргаж, дасгал хийх үедээ ухаан санаагаа амьсгал дээрээ төвлөрүүлээрэй.

• 3 секундын турш аажим амьсгал авах
• 3 секундын турш амьсгал түгжих
• 3 секундын турш аажим амьсгал гаргах

Та жирэмсэн үеийн сэтгэлзүйн асуудлаа бие даан шийдвэрлэж чадахгүй байвал мэргэжлийн сэтгэцийн эмчид хандан зөвлөгөө аваарай. Мөн манай сайтын ХОЛБОГДОХ БАЙГУУЛЛАГА хэсгээс та өөрийн харъяа орон нутаг, дүүргийн эмнэлгийн байгууллага болон эмчийн мэдээлэл аваарай.